Pontus Veteris naceu o 9 de outubro de 1997 presentando as coleccións Primavera Verán das firmas Florentino, Toypes, Montoto e Oky-Coky. O obxectivo era apoiar a industria téxtil galega creando un lugar de encontro para deseñadores e os seus potenciais clientes. A pasarela celebrouse no auditorio do Pazo da Cultura de Pontevedra e a ela asistiron 600 persoas que completaron o aforo dispoñible. O evento foi retransmitido pola Televisión de Galicia e presentado por Uxía Blanco. A modelo María Reyes pechaba os desfiles.

Pronto fíxose patente a necesidade dun espazo maior para o desenvolvemento da pasarela, así que en 1999 trasládase ao anexo Recinto Feiral o que permite duplicar un aforo que seguirá crecendo ata consolidarse en torno ás 2.000 persoas. Tamén en 1999 Pontus Veteris adquire a súa forma actual con dous desfiles anuais: un en febreiro/marzo que mostra as tendencias outono-invierno e outro en setembro nas que se exhiben as coleccións da temporada primavera-verán.

Desde ese ano 1997 diversas firmas galegas presentaron as súas coleccións de moda muller e home en Pontus Veteris. Desde as máis habituais Toypes, Montoto, Florentino, Charoa, María Mariño e Boxley, xunto con Araujo e Makari (que incorporan a peletaría á pasarela desde 2004), ata aquelas cuxa participación limitouse ás primeiras edicións (Oky-Coky, Futura Línea…).

En 2000 e 2001 a pasarela abriuse ao deseño de moda brasileiro. O primeiro ano con 15 firmas sobre todo de calzado, sector no que o país carioca é unha potencia. No 2001, 28 empresas brasileiras presentaron en Pontevedra as súas coleccións de moda praia, calzado, bixutería e confección.

Pontus Veteris sempre estivo aberta ao exterior. Boa proba disto é a crecente presenza na pasarela de empresarios e prensa doutros países como Brasil, México, Portugal, Polonia, Suecia, Dinamarca… Como o é tamén a presentación en febreiro de 2007 da pasarela en Madrid. Presentación que terá continuidade nun futuro próximo con outras en Porto e Barcelona.

Abrir mercados, difundir as creacións da moda galega no exterior foi sempre unha pretensión de Pontus Veteris. Xa en 2002 a Cámara de Comercio presentaba ao goberno galego o proxecto de crear unha Semana da Moda Galega en Pontevedra. O Recinto Feiral podía converterse así no ensaio para as coleccións concibidas para desfiles organizados fora de Galicia e de España. Un soño que a Cámara de Comercio pretende facer realidade en setembro de 2008 coa primeira edición de SEIMOGA (a Semana Internacional da Moda Galega) que aspira a ser a cita obrigada para todos aqueles profesionais que queiran coñecer as últimas tendencias da moda galega e os recursos do puxante sector téxtil de Galicia.