FONDO MARIÑO

Tema que lembra en formas e cores a beleza das profundidades mariñas. O mar ofrécenos unha infinidade de matices do azul, rei indiscutible na paleta desta tendencia. Os tecidos inspirados na auga son frescos e fluídos. Efectos drapeados, lixeiros engurrados, puntos ondulados... lémbrannos o vaivén das olas. A fauna e flora mariña xorden como o actor principal duns estampados con vocación mariñeira e estival. Raias inspiradas nos uniformes dos mariñeiros. Pezas retro con toques náuticos.

Polos, blazers masculinos, sutís cazadoras con cremalleira e carapucha son os protagonistas nun tema sportwear con moito glamour.

UN XARDÍN BOTÁNICO

Unha tendencia que idealiza a natureza e intenta recuperar o seu colorido e sutileza nun mundo cada vez máis pavimento de asfalto. Un xardín botánico sérvenos de referencia, entre delicadas flores ... conviven paxaros, bolboretas e brillantes cabaliños do demo. Estampados liberty dignos de xardíns ingleses, tecidos naturais con liño flameado, texturas rústicas para pezas con detalles románticos, grandes calados debuxando follas, t-shirts con exuberantes flores exóticas, pequenos boleros con fíos irisados. Chaquetas e vestidos rectos esgazados por tecidos creando capas ou formando pétalos. Cortes asimétricos, alongados, para acadar siluetas lánguidas. Tons neutros e naturais da cor da terra conviven cos distintos verdes das follas, flores e froitas acedas deste bucólico xardín.

A VIDA EN ROSA

O chic masculino atópase co baby doll, o feminino máis suxestivo. Roubamos pezas do armario masculino que transformamos, mesturamos e renovamos ata conseguir delicados básicos femininos. Pequenos chalecos con calados posicionados. Finos suéters vaporosos con tecidos de lamé. Polos con efectos ópticos. Canalés mesturados con pequenas flores. Estampados de flores que parecen manchas, manchas estampadas que nos lembran peles de animais ...

Cores: Toda a gama de gris ata o prata, mesturamos con branco e negro. E, engadimos o rosa. Do fucsia mais flúor ao rosa máis pálido, a cor máis controvertido entra nas nosas vidas e, para quedarse unha longa tempada. Mesturado con tons neutros suaviza e sofistica.